أتحرجت قدام خطيبها (هتعملى ايه بقى)؟؟؟؟؟؟؟؟؟؟

هقولكوا قصه مضحكه شويه , بس عايز اعرف من البنات لو انتى مكانها هنا هتعملى ايه

والولاد لو انت لقيت خطيبتك كدا هتعمل ايه

كان فى واحده خجوله جداً وبتتكثف موووووووووووووووت

ومش بتاكل قدام حد خالص الا اللى فى البيت بس , وكانت مخطوبه وبرده مش بترضى تاكل قدام خطيبها مع انه ابن عمها

المهم هى كانت لسه صاحيه من النوم وكدا وبدأت تفطر , لسه مكملتش اكل وكان خطيبها بيخبط على الظهر كدا

فهى طبعا مكملتش اكل وفضل قاعد معاهم لغاية اما جهزوا الغدا

المهم كلهم قعدوا عشان ياكلوا الا هى فخطيبها بيقولها تعالى كلى معايا قالتله والله لسه واكله

قالها عشان خاطرى , قالتله خاطرك على عينى وعلى راسى بس انا مش قادره بجد لأنى شبعانه

(وهى هتموت من الاكل وتفسها تاكل بس مش عايزه من الخجل بتاعها)

جه ساعة العصر استأذن من اهلها انه ياخدها وينزلوا يبصوا على الاثاث بتاع شقتهم عشان يشتروه

فالاهل وافقوا ونزلت معاه , خرجوا شويه وكدا وبعدين جه عن كافى شوب وقالها تعالى نخش

قالتله مش قادره اشرب اى حاجه والله , قاله طب تحلى بأى حاجه قالتله مش عايزه

(وهى من جواها ميته من الجوع ونفسها تاكل المحل كله)

كملوا خروج وهما فى محل بتاع اثاث وخلاص بقى معدتش قادره من كتر الجوع افتكرت بقى افغانستان والفقراء وكل دا جه على بالها لأنها ميته من الجوع ومش قادره

عايزه بقى تروح عشان تاكل , قالتله انا عايزه اروح عشان دماغى مصدعه

قالها طب قبل ما نروح اعزمك على العشا بره

قالتله مفيش محل للعشا وبعدين انا شبعانه ( شوفوا الكدب)

روحوا البيت لقت والدتها مجهزه العشا بس مكنش فى حد فى البيت

فقالها انتى هتسيبينى اتعشى لواحدى , تعالى اتعشى معايا

قالتله لأ مش هقدر انا متعشيه

قالها متعشيه ازاى وانتى طول النهار معايا

فالبنت اتكسفت وضحكت وقالتله الظاهر انى اكلت كتير النهارده

اكلت كتير لما صحيت وبعدين حليت زياده عن اللزوم ومش قادره

فمد ايده وبيأكلها , قالتله مش عايزه اكل

قالها عشان خاطرى بس من ايدى , قالتله مش هقدر

قالها عشان خاطرى اللقمه دى بس , قالتله والله من كتر الاكل حاسه انى هرجع ومن كتر ما انا شبعانه

فعذرها وقالها للدرجه دى شبعانه ؟ قالتله واكتر من كدا كمان

هو خلص وغسل ايديه , وقالها حبيبتى انا همشى بقى(وهى اول مره تتمنى انه يمشى على طول)

قالتله عادى يا حبيبى بس ابقى خلينا نشوفك والكلام دا

الواد استغرب انها مش قالتله لسه بدرى وخليك شويه ودماغه فضلت راحه جايه

وبعدين وصلته لغاية الباب , ومن كتر الجوع نسيت تقفل الباب وجريت على صنية العشا فى المطبخ

وفضلت تاكل بطريقه غبيه وبسرعه (اكيد عارفينها) وهى واقفه كمان ومش قادره تقعد من الجوع

فخطيبها نسى مفاتيح العربيه بتاعته ورجع عشان ياخدها وطبعا عشان ابن عمها دخل من الباب على طول بدون استئذان

فحب يقولها انه رجع عشان نسى مفاتيح العربيه بتاعته , فسمع صوت فى المطبخ

فدخل عليها وهى بتاكل بالطريقه دى وهى من جوعها مسمعتش ولا حست ان فى حد دخل عليها وواقف وراها

المهم فضل واقف باصصلها وهى بتاكل بالطريقه دى

وبعد ما خلصت بتلف وشها عشان تروح تغسل ايدها بقى وكدا

لقت اللى واقف وراها بيبصلها وهو مبتسم ورافع حاجبه كدا (كأنه اندهاش واستغراب وحاجات كدا)

تخيلوا المنظر دا بقى وخصوصاً ان البنت خجوله جداً جداً جداً وشافها وهى بالمنظر دا كدا

قالها ليه كذبتى عليا وقولتى انك مش جعانه ؟؟؟ كل دا جوع ؟؟؟

تخيلوا يحصل ايه؟

البنت اغمى عليها من كتر الخجل

الولاد والبنات بقى

لو انت دخلت على خطيبتك ولقيتها بنفس المنظر دا كدا هتعمل ايه؟

وانتى لو هو شافك بالمنظر دا هيكون رد فعلك ايه؟